തിരുവനന്തപുരം: സെപ്റ്റംബർ 3-ന് ചേർന്ന 56-ാമത് ജി.എസ്.ടി. കൗൺസിൽ യോഗത്തിലെ തീരുമാനമനുസരിച്ച്, ജി.എസ്.ടി. ബാധകമായ നിരവധി സാധനങ്ങളുടെയും സേവനങ്ങളുടെയും നികുതി നിരക്കിൽ മാറ്റം വരുത്തിക്കൊണ്ട് വിജ്ഞാപനങ്ങൾ പുറപ്പെടുവിച്ചു. ഈ മാറ്റങ്ങൾ നാളെ (സെപ്റ്റംബർ 22) മുതൽ പ്രാബല്യത്തിൽ വരും. അവശ്യസാധനങ്ങളുടെയും ദൈനംദിന ഉപയോഗ സാധനങ്ങളുടെയും നികുതി നിരക്ക് കുറയുമെന്നാണ് കൗൺസിൽ വിലയിരുത്തുന്നത്.
വ്യാപാരികൾ ശ്രദ്ധിക്കേണ്ട കാര്യങ്ങൾ
പുതുക്കിയ നികുതി നിരക്കനുസരിച്ചുള്ള ടാക്സ് ഇൻവോയ്സുകൾ സെപ്റ്റംബർ 22 മുതൽ നൽകുന്നതിന് ആവശ്യമായ മാറ്റങ്ങൾ വ്യാപാരികളും സേവനദാതാക്കളും അവരുടെ ബില്ലിംഗ് സോഫ്റ്റ്വെയറിൽ വരുത്തണം. നികുതി മാറ്റം വരുന്ന സാധനങ്ങൾ സ്റ്റോക്കിലുണ്ടെങ്കിൽ, സെപ്റ്റംബർ 21-ലെ ക്ലോസിംഗ് സ്റ്റോക്ക് പ്രത്യേകമായി രേഖപ്പെടുത്തിവെക്കണം. നികുതി നിരക്ക് കുറഞ്ഞ സാഹചര്യത്തിൽ, അതിന്റെ ഗുണഫലം ഉപഭോക്താക്കൾക്ക് കൈമാറണം. നികുതി ബാധ്യത ഒഴിവാക്കിയ സാധനങ്ങളുടെയും സേവനങ്ങളുടെയും ഭാഗമായുള്ള സ്റ്റോക്കിന്റെ ഇൻപുട്ട് ടാക്സ് ക്രെഡിറ്റ് റിവേഴ്സൽ ചെയ്യേണ്ടതുൾപ്പെടെയുള്ള നടപടികൾ വ്യാപാരികൾ സ്വീകരിക്കണം.
പുകയില ഉത്പന്നങ്ങൾക്ക് മാറ്റമില്ല
സിഗരറ്റ്, ബീഡി, ഗുഡ്ക, പാൻമസാല തുടങ്ങിയ ഉത്പന്നങ്ങളുടെ നികുതി നിരക്ക് 40% ആയി ഉയർത്താൻ കൗൺസിൽ തീരുമാനിച്ചിട്ടുണ്ടെങ്കിലും ഈ മാറ്റം സെപ്റ്റംബർ 22 മുതൽ പ്രാബല്യത്തിൽ വരില്ല. ഇത് പിന്നീട് വിജ്ഞാപനം ചെയ്യുന്ന തീയതി മുതലേ നടപ്പിലാകുകയുള്ളൂ. അതിനാൽ, ഈ ഉത്പന്നങ്ങൾ കൈകാര്യം ചെയ്യുന്ന വ്യാപാരികൾക്ക് തൽസ്ഥിതി തുടരാം. നിരക്ക് മാറ്റം പിന്നീട് വിജ്ഞാപനം ചെയ്യും.
കൂടുതൽ വിവരങ്ങൾ
വ്യാപാരികൾ സ്വീകരിക്കേണ്ട നടപടികളെക്കുറിച്ചുള്ള വിവരങ്ങൾ സംസ്ഥാന ചരക്ക് സേവന നികുതി വകുപ്പിന്റെ വെബ്സൈറ്റായ www.keralataxes.gov.in-ൽ ലഭ്യമാണ്. വിശദവിവരങ്ങൾക്കായി വകുപ്പ് പുറപ്പെടുവിച്ച വിജ്ഞാപനങ്ങൾ കാണേണ്ടതാണ്. നികുതി നിരക്ക് മാറ്റവുമായി ബന്ധപ്പെട്ട കാര്യങ്ങൾ വ്യാപാരികൾ / സേവനദാതാക്കൾ പ്രത്യേകം ശ്രദ്ധിക്കണമെന്നും നികുതി കുറച്ചതിന്റെ പ്രയോജനം ജനങ്ങൾക്ക് അനുഭവവേദ്യമാക്കാനുള്ള നടപടികൾ കൈക്കൊള്ളണമെന്നും സംസ്ഥാന ചരക്ക് സേവന നികുതി കമ്മീഷണർ അറിയിച്ചു.