ഈ മാസത്തെ സാമൂഹ്യസുരക്ഷ പെന്ഷന് (welfare pension) ജൂണ് 20 മുതല് വിതരണം ചെയ്യുമെന്ന് ധനമന്ത്രി കെ എന് ബാലഗോപാല് അറിയിച്ചു. 62 ലക്ഷത്തോളം പേര്ക്ക് പ്രതിമാസം 1600 രൂപയാണ് പെന്ഷനായി ലഭിക്കുക. ഈ സര്ക്കാരിന്റെ നാല് വര്ഷ കാലയളവില് 38,500 കോടി രൂപയാണ് സാമൂഹ്യസുരക്ഷാ പെന്ഷന് നല്കാനായി ആകെ ചെലവഴിച്ചതെന്നും മന്ത്രി ഫെയ്സ്ബുക്കില് കുറിച്ചു.
2016-21 ലെ ഒന്നാം എല്ഡിഎഫ് സര്ക്കാരിന്റെ കാലത്ത് യുഡിഎഫ് ഭരണകാലത്തെ 18 മാസത്തെ കുടിശ്ശികയുള്പ്പെടെ 35,154 കോടി രൂപയാണ് ക്ഷേമപെന്ഷനായി വിതരണം ചെയ്തത്. അതായത്, ഒന്പത് വര്ഷം കൊണ്ട് ഒന്നും രണ്ടും പിണറായി സര്ക്കാരുകള് ക്ഷേമപെന്ഷനായി നല്കിയത് 73,654 കോടി രൂപയാണ്.
2011-16 ലെ യുഡിഎഫ് സര്ക്കാരിന്റെ കാലത്ത് ക്ഷേമ പെന്ഷനായി ആകെ നല്കിയ തുക 9,011 കോടി രൂപയാണെന്നും കെ എന് ബാലഗോപാല് ഓര്മ്മിപ്പിച്ചു. കേന്ദ്രസര്ക്കാര് കേരളത്തിനുമേല് ഏര്പ്പെടുത്തിയ കടുത്ത സാമ്പത്തിക ഉപരോധത്തിലും സാധാരണക്കാരുടെ ക്ഷേമ കാര്യങ്ങളില് അതീവ ശ്രദ്ധയോടെയുള്ള സമീപനമാണ് സര്ക്കാര് സ്വീകരിക്കുന്നതെന്നും അദ്ദേഹം വ്യക്തമാക്കി.